Ҷунбиши «Ислоҳот ва Рушди Тоҷикистон» аз изҳороти Илон Маск дар бораи эҳтимоли баста шудани Радиои Озодӣ (Radio Free Europe/Radio Liberty) изҳори нигаронӣ мекунад. Дар ҳоле ки журналистикаи мустақил дар Тоҷикистон таҳти фишори сахт қарор дорад, Радиои Озодӣ ягона манбаи боэътимоди иттилооти воқеӣ ва бетарафона барои миллионҳо шаҳрвандон боқӣ мемонад.
Радиои Озодӣ яке аз охирин расонаҳои мустақилест, ки хабарҳои воқеӣ ва бетарафро ба шаҳрвандони Тоҷикистон мерасонад. Дар кишваре, ки озодии матбуот сахт маҳдуд шудааст ва ҳар гуна андешаҳои алтернативӣ саркӯб мегарданд, мавҷудияти ин расона аҳамияти ҳаётан муҳим дорад. Баста шудани Радиои Озодӣ сабаби пайдо шудани холигии иттилоотӣ мешавад, ки онро таблиғоти ҳукуматҳои худкома пур хоҳад кард.
Бо афзоиши нуфузи иттилоотии Русия ва Чин дар минтақа, Радиои Озодӣ яке аз абзорҳои муҳими муқовимат ба таблиғоти бардурӯғ ва таҳрифи ахбор мебошад. Ин расона ба принсипҳои шаффофият ва воқеият пойбанд буда, ба шаҳрвандон имкон медиҳад, ки ахбори гуногунҷанбаро дастрас намоянд.
Иёлоти Муттаҳидаи Амрико ҳамеша ҳимоятгари озодии баён ва ҳуқуқи инсон будааст. Дар сурати баста шудани Радиои Озодӣ, ин метавонад мавқеи Амрикоро дар минтақа заиф кунад ва имкон диҳад, ки фазои иттилоотии Осиёи Марказӣ зери нуфузи комили режимҳои худкома қарор гирад.
Дар солҳои охир садҳо журналист дар Тоҷикистон мавриди таъқиб қарор гирифта, даҳо аз онҳо зиндонӣ шудаанд. Дар чунин вазъ, Радиои Озодӣ яке аз минбарҳои асосии расонидани мушкилоти озодии баён ва ҳуқуқи инсон ба ҷомеаи ҷаҳонӣ боқӣ мемонад.
Мо аз Департаменти давлатии ИМА ва ҷомеаи байналмилалӣ даъват мекунем, ки аз Радиои Озодӣ ва дигар расонаҳои мустақил пуштибонӣ кунанд. Озодии баён асоси рушди демократӣ ва субот дар минтақа мебошад. Ҳифзи он на танҳо ба манфиати шаҳрвандони Тоҷикистон ва Осиёи Марказӣ, балки ба манфиати тамоми ҷаҳон аст.
Шарофиддин Гадоев
Раиси Ҷунбиши «Ислоҳот ва Рушди Тоҷикистон»
11 феврали 2025
